Mar 13 | WSK | STEP | Jesus temple bita aratuwaram se noko olekem bo nu maonam, “Kari Biya, arikko! Kawam imi ninguru kaloman! Manga bibiya yawarakala wore te kaloman!”

Mark 13

Jesus maingte temple parasuwumonko mu ko den balam

(Mat 24: 1-2; Luke 21: 5-6)

1 Jesus temple bita aratuwaram se noko olekem bo nu maonam, “Kari Biya, arikko! Kawam imi ninguru kaloman! Manga bibiya yawarakala wore te kaloman!”

2 Se Jesus nu maonam, “Ni temple ko kawam bibiya arigisam imi mu udagi te parasuwumonko. Se manga bo ta numi awete me bagomonkowo, mu suen la pakaku warmon se kapa sapurukko.” ^{▼▼Mark 13:2 Nuna temple parasuwumonko ko duap: Luke 19:44.}

Ikup duap duap aratukko

(Mat 24: 3-14; Luke 21: 7-19)

3 Nuna Duruk Olive te namaman. Duruk Olive mu gamung koma saki te, se temple mu koma saki te. Se Jesus daigam bagaram se Peter, James, John, Andrew buta nukote taiman ale isarman, 4 “Tom amaru temple imi maguwumonko ya? Se anape mel girok aratuk se ana aringinak ale te ikinak, ‘Tom pingi aram bo,’ manakko?”

5 Se Jesus nunga maonam, “Nina kari saki ninga kulurmon bore ko ninguru sinar talko! 6 Udagi kawel kari suen biya taimon aninga aip te nunumi balmon, ‘Anigita Kristus,’ mamon, ale kariimet suen biya nunga kulurmonkowo. 7 Tom nina kager pingi se awar ko den ikial, mu me nguangaralko. Mel mu aratukkowo. Bare tom nukum mu te me tai aratoso, tom nukum mu aitak.

8 Wonong sor bo barasuk bo ilak kagerurukko. Se king bo barasuk bo ilak butatala numi iluwokko. Se sor saki te wanara bibiya kapurukkowo. Wonong saki te karak biya aratu aratu namurukkowo. Mel suen la imi mu imet kuriang iluwokko se kumik yaman ikia duap beteso wore turan.

9 “Nina sinar ago bagaralko. Nuna ninga ilumon (supuling alo nomokete) isa ningarmonko. Ale ((ninga ilumon ale)) synagogue ningi ninga lilumomonko. Nina aninga olekem se mu ko nuna ninga gi ali supuling se king nomokete ninga bangarmon ale ninga isarmonko. Se tom umu te nina aninga dugu duap balalko. 10 Sor suen biya te aninga gilalong den nungaru kutuwumon se asele tom nukum. 11 Bare tom nuna ninga ilumon ale isa ningarmon, mu nina den aguwaya balalko mu ko giral ale ikia me ninga morukko. Mena. Mu Korang Bur kota ikia ningaruk se umutang la te munakaralko.

12 “Se tom mu te kariimet saki nongota nunga launuria kager kari nuguting te nunga awumon se nunga momon se kuemonko. Se nonet alo saki mu nongota nunga kuriang nungumik te uwutatala betemonko. Se kuriang alo mu betela barasomon ale nongota nunga nunam nonet kager kari nuguting te nunga awumon se kuemonko. 13 Aninga aip nenengate aniso, se umutang ko kariimet suen biya nina nego ko nongomang ninguru magurukkowo. Bare awiriya ani buring me aisuk, am sokel ago sanamuruk nama tom nukum te, umutang mu Kaem nu sangaru taukko.

Ikup aromemek Jerusalem wonong irokko

(Mat 24: 15-28; Luke 21: 20-24)

14 “Maingte nina mel memek nunguningkiri Daniel ko balam mu kuwim me te bagurukko nunguningkiri mu te baguruk se arigalkowo.” ^{▼▼Mark 13:14 Daniel 9:27; 11:31; 12:11. Jesus me tairam la, yar BC 168 mu te, Syria nunga kager supuling, ko nup Antiochus Epiphanes, nu Jerusalem temple ningi kasu naguram ale nunga kaem kawel Zeus wore ko altar kaloman ale te tama kawel buruk pagar wore te tama beteman. Kilek umu te nuna Kaem ko nup balu maguwukasan ale Juda alo nunga balu maguwukasan tala. Aking tala Jesus kueram ale barasam mu ko buring ko, ikia memek mu tala Juda alo nungumik te aratam. Kariimet saki ikisan udagi ikup bo uwuta aking aratukko: 2 Thes 2:1-12.} (Kari den imi kaurok mu ninguru ko ikia taukko.) Se tom mu te nina arikaya Judea sor te bagasan, mu nagural duruk kulupik ningi nama saparalko. 15 Se kari bo kawam gul te baguruk agi mu, nu kapuruk ko melmasak kawam ningi aniso mu me ta giokko, nu am diram nagurok namurukko. 16 Se kari bo ningam te baguruk agi mu, nu peleruk ko guang bo me ta taukko.

17 “Tom mu te imet nutagu karogo, se imet kuriang amin tui se anira, mu ura kowar betemonkowo! 18 Ikup imi daula marir tom te aratuk bore ko, ko Kaem aru ngatongalko. 19 Mu awuk, tom mu te ko ikup aratukko mu am memek biya nunguningkiri, tom Kaem taiti ali beteram ko tom te eng tai aitak te ikup aratuwoso mu iwita mena. Se udagi te mu iwita mena tala. 20 Se Kaem Biya tom memek mu me tukunang awurok, mu kariimet bo marak me bagurukko, suen biya kuemon parangomonko. Bare nu ko kariimet noko ma balam mu nunga ikia tauk, ale tom tukunang awurokkowo.

21 “Se tom mu te kariimet bo ninga manuk, ‘Arigalko, Kristus bagoso iweya,’ mauk, aking bo ninga manuk, ‘Kristus owore te bagoso,’ ma baluk, bare den mu ko nina me nengemang ningi nunguning arukko. 22 Mu awuk, Kristus kawel, se prophet kawel suen biya aratomon, ale kariimet te nongomang kulurmonko kilek bibiya duap duap betemonko, ale te Kaem ko kariimet noko ma balam mu ago la nunga kulurmonko ago kaemonko. ^{▼▼Mark 13:22 Kilek kawel te kariimet nongomang kulukurmonko: 2 Thes 2:9-10; Rev 13:13.} 23 Ikialko, mel imi me aratam la, ani girem ale ko ninga manaruwasam.

Kari ko Kuriang peleruk tairukko

(Mat 24: 29-31; Luke 21: 25-28)

24 “Se ikup yaman mu ko tom menaruk mu,

'Worem motam tiromorom paguk,
se sige me nikim kapuruk,
25 se baras mu kutukutuk mamon kapomonko.
Se mel aora aora taiti kuali anisan mu yukumonko.' ^{▼▼Mark 13:24-26 Isaiah 13:10; 34:4. Rev 6:12-14 ago arikko. Kari ko Kuriang tairukko: Dan 7:13.}
26 “Asele tom mu te kariimet nuna Kari ko Kuriang taiti nuwi ningi nikim biya sokel ago tai kapawuruk se aringimonko. 27 Se nu ko engel alo nunga awurok se ali koma suen biya te namomon geragomon, ale ko kariimet maingkala noko ma nunga balam mu nunga gi gi arungak taimon ale nunga bolala awumonko. ^{▼▼Mark 13:27 Engel alo Kaem ko kariimet nunga bolala awumonko: 1 Thes 4:16-17.}

Tam fig ko kausa

(Mat 24:32-35; Luke 21:29-33)

28 “Nina tam fig te ikia talko. Tom tam fig ko kower awete gurek gawa iru diruwuso mu nina umutang te ko ikisan mu na inang ko nunguning gia ko tom pingi aram masan. 29 Koma suwanta tala nina mel ani ko ninga manem mu aratomon se arigal, mu nina te ikialko tom pingi aram ma balalko. 30 Ani nunguningta ninga manorsam, tom imi ko kariimet mu me kuemon la, mel imi suen la aratu sapurukko. 31 Taiti ali karogo menarukko, bare aninga den mu me ta menarukkowo.

Sinar ago bagara ko den

(Mat 24:36-44; Luke 17:26-30, 34-36)

32 “Bare tom diram se worem motam awilaya te mel suen la imi aratukko mu kari bo ta me ikiso. Engel alo duruk te me ikisan, se Namar betela me ikiso tala. Nuet kota diram tom mu ko ikiwoso. 33 Se nina ninguru sinar ago bagaralko! Mu awuk, tom mu amaruya aratukko mu nina me ikisan.

34 Se den mu ko nunguning te ikialko mu iwita: Kari bo sor bo awar mu te namurukko se noko kawam ko ura kariimet nuguting te beteram, ale ura nomoke nomoke balu balu nungaram. Ale kari lage kuring bituokko mu maonam, ‘Ni lage kuring bitaru ale loaga se bager se ani pelerik tairikko,’ ma balam.

35 “Buta se nina sinar ago loaga se bagaralko! Mu awuk, kawam ko kotam amaruya tairukko mu nina me ikisan. Nu turom bainga ningi tairuk agi, uriluan agi, tarak niarukko tom ago agi, ukirok turomola agi, mu nina me ko ikisan. 36 Se nu tairate tairuk ale nina aniwaral se ningarkuk bore ko sinar ago bagaralko. 37 Den ani ninga manorsam imi mu kariimet suen la nunga manorsam, ‘Loaga se bagaralko.’”